適逢朋友生日，拍板食海鮮，就話不如去流浮山食。
流浮山聽落好遠，其實喺天水圍再入喲(感覺再遠啲係咪?)，但其實6點中環放工，6：45pm已經到天水圍西鐵站，的士入流浮山大約40蚊，7點已經到；或者直接喺中環搭巴士967到天水圍轉的士，都係一個鐘左右。都接受到係咪？
《邦記海鮮酒家》係我哋嘅不二之選，之前已經食過幾次，覺得佢煮得好食，無論係蒸炒煮炸，時間都啱啱好，又夠鑊氣。
今次我哋都係去到先揀海鮮，去咗《許照記海鮮》貪佢乾淨新鮮，見到啲海鮮跳跳紮。買咗龍蝦、聖子、東風螺、奄仔蟹、鮑魚、蝦，之後就過返去邦記加工，講好咗每樣海鮮要點煮之後就等開餐。
一坐低，姐姐即刻送上熱辣辣嘅香濃豆腐鮮魚湯，超足料，仲要free of charge，勁肚餓之際飲咗碗湯先，唔好講咁多。
上湯龍蝦伊麵底：龍蝦做過gym，肌肉結實有彈性，伊麵吸晒啲汁，又唔會太過林，冇得輸。
鼓椒炒聖子：惹味、香濃、有鑊氣，未上菜已經聞到濃濃嘅鼓椒味飄過，香氣四溢。聖子起晒肉，食起上黎更爽。
炆煎龍躉頭腩：不得不提，呢個菜必須要預訂，唔訂一定冇得食，超好食！一啲都唔腥，大大件，好香，食過一次之後每次都叫。
香煎金蠔：嚟到流浮山，冇理由唔叫蠔啫？香煎金蠔走唔甩，每隻都係咁肥美大隻，沾砂糖食好味。
鹽焗東風螺：呢味菜我都係第一次食，出面我都未試過咁嘅煮法，但係原來咁樣煮又有另一番風味，比白灼更能帶出東風螺嘅風味。
蜜糖煎雞翼：都係要訂，唔知點解就係覺得呢度嘅蜜糖煎雞翼好好食。又係必點。
奄仔蟹：今次係第一次食奄仔蟹，經過今次之後我相信，我以後一定會再食！用鹽焗令到佢個殼鹹鹹地，又唔會好似潮州打冷嗰種因為凍蟹所以令到啲蟹肉實咗嘅感覺。加埋蟹膏，真係好邪惡。
豉油王蝦：蝦頭開邊再炸，本身仲驚佢會好乾，點知又認真唔會喎，同樣炒得非常香口。
薑蔥蒸鮑魚：半隻手掌咁大，蒸得啱啱好唔會覺得韌，亦係必點。計番每隻都係50幾蚊！！除咗煮海鮮好食之外，邦記仲有個炒飯都好食同出名，不過今次已經好夠皮，真係食唔落，唯有下次。
溫馨提示：記得要帶現金，唔收卡
海鮮$1900
加工連雞翼、龍躉 $1100
6人份量
邦記海鮮酒家
網址: https://s.openrice.com/QrbS0SKi000
地址: 流浮山正大街39號地下
電話: 24721292
星期一至日 10:30 - 23:30
付款方式 現金
Comentarios